< مجتمع كيونوتك أندرويد

- مراجعه للهواوي اسند ميت ٧

مراجعه للهواوي اسند ميت ٧

الكاتب: بنت احمد 17-02-2015












السلام عليكم ورحمة الله وبركاته

بسم الله

هذا تعقيب وتعديل! على نفس موضوعي الاول

بخصوص هواوي اسند ميت7 





هذا الجهاز بكرتونه نفس اللي معي بس طبعاحملت الصوره لاني عجزت اطلع الكرتون بعيد ههههههههه





صار لي استخدمه اسبوع .. 5 ايام بالتمام




راح اعقب لكم ع المميزات اللي ذكرتها ايضا العيوب...


سبق اني قارنت الجهاز بآيفون 6 بلس منناحية الشكل وقلت ان حجم الشاشه 6 انش وذكرت ايضا ان شكل الهواوي بالنسبه لي ع الاقل افخم جدا من الايفون بلس ولونه اجمل .. كتصميم خارجي اعطي الهواوي 9 من10 .. بسبب عرض الجهاز اللي مايخليك ترتاح وانت ماسكه..









هواوي استغلت كبر الجوال وكبرت الشاشه ونحفت الحواف وهالنقطه حبيتها كثير بعكس الايفون اللي صراحه كبير ع الفاضي ههههههه برأيي.. وش فايدة جوال 6 انش وشاشته مصغرينها..


مثل ماقلت ماتقدر تمسك الهواوي بيد وحده



وبالتالي هم مسويين لك حركه فالكيبورد نفسه لو حاب تخلي الكيبورد مضغوط عاليمين او ع اليسار حسب ماانت ترتاح بحيث تسهل لك الكتابه بيد وحده.. حتى ازرار التنقل فالشاشه تروح لك يايمين يا يسار .. بس مشكلتها مو ثابته حسب ماتحرك جهازك تروح يمين وشوي تروح يسار.. بالعربي تطفشك.. 






وتقدر تلغي هالميزه وهذا افضل هههههههههه

ايضا ذكرت موضوع البصمه الجميله اللي تقدر تستخدمها فالتصوير وفي فتح قفل الجوال بسهوله..  ويمكنك تسجيل 5 بصمات ياعيني




وكمان الحاجه اللي لاحظتها طبعا لاني من مستخدمين جالكسي سابقا هو انك لما تحط رمز لجوالك مايحتاج تحط البن بعدين تضغط موافق عشان يفتح لك.. عجبني فالهواوي مجرد ماتحط البن حقك يقول طق! ويفتح ببساطه زي الايفون.. واساسا مارح تحتاج البن عموما لان عندك بصمه ولا احلا



من سيئات الجهاز بنظري »الخط« اللي مايتغير فالجهاز ابدا ولازم روت بعدين يقول مايتوافق مع الجهاز.. وكرهت حياتي لان هالشي مهم بالنسبه لي والخط ذا فاقع كبدي وكبييييير بس اشوه يتصغر ههههه 


من ايجابياته مافيه ولله الحمد اي تعليق نزلت تقريبا 15 تطبيق وعليها وسجلت بياناتي وكل شي كان بخفه وسلاسه ويفتح النفس وربي تحس بيدك جواااال من جد .. وسريع ع فكره وشبكته قويه وتتصل بسرعه بالايباد وبالمودم مقارنةبالجالكسي اللي كان معي..




وكمان فيه حركه مجنونه.. تقدر توصل عليه الهاردسك ويفتحه لك وتعدل وتمسح وتضيف اللي تبي.. كم جوال يقدر يسويها!!



من سلبيات الجوال انه مظلم هههههه اي والله.. الحين لمن اجي اضبط سطوع الشاشه معروف عند كل الجوالات من ايفون وجالكسي تحط السطوع فالنص تلقائي يعني عشان توفر بطاريه.. انا لما احطه فالنص كل من شاف الجوال يحسبه على وضع توفير الطاقه .. لازم ترفع السطوع للاخير ويمشي الموضوع تمام وينور جوالك..
تمنيت تكون شاشته 4k بس للاسف


جزاهم الله خيرا اعضاء كيونوتك اللي ردو افادوني بخصوص البطاريه .. خليتها على الوضع الذكي ف صرت اقدر اسوي تحسين عشان يخف الضغط عالبطاريه وتتقفل البرامج الي ما احتاجها بالتالي وقت اطول تدوم معي



يجي فنفس كرتون الجوال وصلة تقدر تشحن فيها من الهواوي لاي جوال اندرويد ثاني وهالحركه حبيتها تفك ازمات.. ولانها وصلة قصيره مره تقدر تاخذها اي مكان معك

المهم ماعلينا... 
نجي لوضع توفير الطاقه الفائق بصراحه شي حلو لما تكون فدوامك مشغول ومنت فااضي لا لنت ولا غيره تضبطه من الاشعارات على وضع توفير الطاقه الفاااائق وش ميزته ؟ تطفي لك كل شي فالجهاز من برامج وواي فاي وتخصص لك وصول سريع للمكالمات والرسايل والسجل فقطططط وهذي حركه حلوهتحافظ لك ع البطاريه 



جا وقت الكاميرا.. الاماميه 5 م ب والخلفيه 13 ... تصويرها جوه البيت جدا سيء والله على ما اقول شهيد موشوشه مو حلوه ابدا..لا اماميه ولا الخلفيه.. بس برى البيت الوضوح حلو مره لانو برى اكيد بتكون حلوه والوانها مشبعه وواضحه .. 

الحين عرفت السبب.. عيب مصنعي.. اترك لكم الصور









نجي للصوت... يقولون dts بس لا هي مو كذا


الdts لازم له سماعتين او فتحتين فالجوال هذي فتحه وحده فالجوال بس..

جربت اشغل موسيقى الاغاني الهاديه تطلع واضحه وصوتها عااالي وتجنن بس تعال شغل طقطقه وتنكس... انواااع الازعاج ..وشوشه تحس السماعه ماتتحمل الازعاج العالي تبدا تسمع ازعاج مو اغنيه.. 

بس بشكل عام .. من يحب يسمع موسيقى صاخبه بصوت جوال! انا افضل الهيدست .. ركب السماعه واستمتع .. 

انا عارفه اخر شي محد بيشتري الجهاز بسبتي ههههههه .. بس والله الجهاز بطل يعني كل شي فيه حلو .. انيق .. الكاميرا جوا البيت او فالظلام تحديدا توشوش وبصلحها دام معي الضمان ..حاليا اهم شي ماتفشلنا برى وهذا تصويره برى





والصوت محلوله مسألته سماعات وخلاص

الجوال فخم شكلا ومضمونا جدا عملي.. للي مو عاجبه ثيم الجهاز حاطين لك ثيمات هديه تقدر تغير قرابة ال10 ثيمات وفي حركات ذكيه فالجهاز .. تهز الجوال وتتغير الخلفيه.. تقدر تسوي خلفيات متحركه.. الاستديو فيه وصول سريع للكاميرا وتقدر تتحكم بعددالبومات الصور ومحتوياتها وطرق تنسيقها فالاستوديو..
من الحركات اللي عجبتني اشعارات التطبيقات لانه يخيرك

وايضا شريط التنقل تقدر تغير زر الرجوع او التنقل بين التطبيقات او زر القوائم وتنقلهم حسب اللي يريحك فاستخدام الجهاز



وهنا عندك التحكم بالحركه



ما ادري كم نظام فيه برامج الاوفيس.. بس هذا برنامج في الهواوي يختصر جميع برامج الاوفيس



واجهة الاتصال كثير راقيه وتعجبني وفيه تحت المزيد ويطلع لك المفكره + التقويم ..شي روعه صراحه ماكان في سامسونغ ومادري الايفون فيه هالميزه لما احد يتصل عليك ولا لا


وفيه من ضمن الادوات الموجوده عدسه مكبره وتطبيق مرآه لما تنفخ ع المايك يسوي لك ثيمات حلوه لصورتك



تقدر تنقل التطبيقات من الهاتف للذاكره الخارجيه والعكس بدون برامج وزحمه وهالشي كثير فرحت فيه لان سامسونغ كانت فيه هالميزه بس مو اي برنامج تنقله لك

في ميزات اخرى ماذكرتها لانها ماتحضرني الان


ذاكرة الجهاز بطله .. اللي معي نسخة ال 32غيغا الذهبي.. بمنفذين شريحه مايكرو ونانو وتقدر تستغني عن النانو لو حبيت وتحط اس دي كارد. 

في ٣ الوان من الجهاز.. ابيض واسود رمادي وذهبي .. الابيض والاسود نسخة ١٦ غيغا وبمنفذ شريحه واحد.. عدا عن ذلك هو نفس مواصفات الذهبي
ابشركم .. رح ينزل ان شا الله تحديث المصاصه اللولي بوب للهواوي قريبا.. وان شا الله احدثه اول ما ينزل



اذا اعجبكم الريفيو البسيط ..ياليت تطقو لايك او هارت او مدري وش اسمه وثانكيووو .. الى اللقاء في جوال جديد

56
أعجبني!

التعليقات (24)

وااو جد مش معقول اهنيك ع الريفيو الأكثر من رائع
ما قتنعت بهالجهاز وخاصة بعد شرحك،

و برأيي ما فيكي تقارنيه مع ايفون 6 بالشكل ، لان ال6 احلا بكتير و ايا شخص بلاحظ هالشيء.

الكاميرا سيئة لجهاز بمواصفات عالية هي بتكفي لعدم شراؤه.

شغلة الازرار فيها تضيفها ايا شركة بتحديث lollipop,

انا ما عجبني هالجهاز و بظن اخد اكتر من حجمو عاليوتيوب .

يعطيكي العافية
اخوي رايك واحترمه بس انا قارنته بالايفون من حيث الشكل لانهم يملكون نفس حجم الشاشه.. انا عجبني ديزاين الهواوي اكثر وذكاء هالشركه فاستغلال كبر حجم الجهاز وصنع منه جهاز راقي جدا.. بالنسبه للكاميرا مافيك تحكم عليها انها سيئه .. انا حسبتها فعلا سيئه بس طلعت كاميرتي خربانه وكثير ناس اشترو الهواوي وعجبتهم كاميرته
شي كبيرر ي عمري
عندي الجهاز والتصوير مافيه اي مشكلةداخل المنزل او خارجه في الاضاءه المتدنيه او العالية ....شكرا علي التقرير
تقرير مميز جدا ابداع

الله يعطيك العافيه شرح كافي ووافي
بعض المميزات موجودة بالنوت 3
بصراحه النوت معي من 7 شهور ما قد علق ولا قد ارتفعت حرارته وبطاريته تجلس يوم انا محمل 25 برنامج نصها ألعاب بأحجام كبيرة ولا يعلق الجهاز

بس عيبه حجمه كبير جدا
و احد عيوبه ان السماعات بالاخلف
اذا كنت تبي تسمع شئ وانت ماسك كيف بتسمع او كيف بيكون الصوت واضح !!

شكرا على التقرير و ننتظر جديدك
الصورة اللي فيها كاسة عصيرة .. لوكانت الصورة كدة يبغالك تغيرة الجهاز لو عليه ضمان انا اخويا معاه واحد زيه واستخدموا جدا ممتاز من ناحية البطارية تقعد يومين ومتاكد من الموضوع دا بس الواجهة ثقيلة شوية ولكن استبدلتها ب واجهة نوفا جدا سريعة وخفيفة
يعطيك العافيه علي الشرح عطيتني معلومات كنت حاب اعرفها عن الجهاز
متاكد من موضوع الهارد دسك اخي يعني هاي الشغلة جد مهمة نسبة لي و كيف تشبكه هاي الشغلة ممكن تخليني اشتريه للجوال عشان عندي هارد ديسك 2 تيرا معبي جزء كبير منه افلام و بدي افتحهم على الجوال ارجوا الرد و عجبني الجوال بصراحة اشي رهيب انا ان شاء الله بشتري نسخة32 جيجا
اخي شوف هالرابط وقدمه ع الدقيقه ال 14:20 وشوف الميزه بعينك

http://youtu.be/ZSrrM-oWpO4
ليش قارنت مع الايفون لو تقارنه مع النوت ونشوف من أفضل جهاز بنظام الاندرويد
قريبا ان شا الله
شكرك أختي ننتظر المقارنة مع النوت والله يعينك من متعصبين السامسونج
كيف وضع توفير الطاقة الفائق شغال وال nfc شغال !!
اخوي الان اف سي مفعل ع طول ومايصرف بطاريه ابدا ..يضل مفعل بس مجرد ماتشيل وضع التوفير يشتغل مع الواي فاي
موضوعاتك رائعه
ليش ما اقدر ارد ع الموضوع
موضوع طويل ومتكامل ومزود بالصور ومجهود واضح ع الموضوع أشكرك مقدما ع جهودك

بالنسبة للشكل أشوف الآيفون6 أفضل أنا الآيفون6 بلس ماحبيته بالمرررررررا

أما فيما يخص الشاشة المظلمة هذي من الشركة نفسها ع شان توفير الطاقة وع شان الجهاز ما يسخن


وأخيرا الله يبارك لك فيه جهاز
شكرا لك اسعدني مرورك
ياختي كم سعره بسعوديــه صراحــه بشتريــه
ب 2099 ريال
احب مراجعاتك
واتمنى تقارنيه مع النوت 4 لولي بوب
وليش ما رجعتي الجوال للصيانه لان الكاميرا شطلها فيها عيب مصنعي
ومن ناحية الواجهة هل انتي راضيه عنها
لاني احس خلط والويدجت والتطبيقات المختصرة مع التطبيقات الأساسية شغلة سلبيه
يتم تحميل باقي التعليقات..
يجب عليك تسجيل الدخول أولا لتتمكن من التعليق. (تسجيل الدخول) (تسجيل عضو جديد)
مواضيع ذات صلة من مجتمع كيونوتك ..
آخر اخبار التكنولوجيا
أجهزة ذكية